O alumnado da Rede municipal de comedores escolares escolle hamburguesa e xeado artesán de vainilla para rematar o curso

O Concello de Ames, a través da Concellaría de Educación, volve a darlle a oportunidade aos nenos e nenas, que son usuarios/as da Rede municipal de comedores escolares, de votar polo menú de fin de curso que se servirá o vindeiro xoves 18 de xuño. O primeiro prato elíxeo a técnica municipal en nutrición, mentres que o alumnado votou para escoller o segundo, que será hamburguesa, e a sobremesa, que será xeado artesán de vainilla. As eleccións desenvolvéronse durante o horario no que se emprega o servizo de comedores no CEIP Agro do Muíño, CEIP A Maía, CEP de Ventín, CEIP de Barouta, EEI do Milladoiro e nas escolas unitarias de Covas e Ortoño, o pasado xoves 4 de xuño.

Este é o vixésimo primeiro ano no que se celebran estas peculiares eleccións nos comedores escolares de Ames. Nesta ocasión, o alumnado tivo que escoller entre cinco posibilidades: albóndegas con arroz e salsa de tomate; pizza de xamón e queixo; churrasco con ensalada de froitos vermellos; hamburguesa con ingredientes a elixir; e salmón ao forno con arroz. 

Por outra banda, a listaxe de opcións de sobremesa tamén contiña cinco opcións que eran o iogur artesán con melocotón; xeado artesán de vainilla; xeado de polo; flan con nata; e amorodos con nata. 

Dende o 2011 o churrasco con patacas fritas gañou en nove ocasións e a pizza de xamón e queixo dúas veces. En 2011, 2012 e 2013 gañou o churrasco, mentres que en 2014 e 2015 impúxose a pizza. En 2016, 2017, 2018, 2019, 2020 e 2021 volveu a gañar o churrasco como o prato favorito dos nenos e nenas da Rede municipal de comedores escolares ata o ano 2022 no que por primeira vez se impuxo a hamburguesa.  

Deste xeito, a hamburguesa repite por quinto ano consecutivo como prato principal para o menú de fin de curso do vindeiro xoves 18 de xuño, penúltimo día de clase, xa que o venres unha gran parte do alumnado xa come nas súas casas. Como sobremesa, os rapaces e rapazas volveron escoller o xeado artesán de vainilla.